Fornelos de Montes sorprenderache pola súa gran riqueza natural, onde os grandes protagonistas son a serra do Suído e os ríos que descenden nacidos a máis de mil metros, deixando impresionantes praias fluviais e fermosas fervenzas ao seu paso. E é que o verde das súas terras é un dos maiores atractivos turísticos da localidade, con gran variedade de rutas que te levan por paraxes case máxicas, poboados de carballos centenarios e castiñeiros da fauna máis emblemática.
Déixate conquistar tamén polo seu patrimonio histórico, artístico e etnográfico, cos xacementos castrexos do Monte da Cidade, os restos de gravados rupestres do Coto do Galo, os petróglifos de Xampardiño, a mámoa de Borraxeiros ou os restos arqueolóxicos do monte Castrove. E baixo as súas terras, na parroquia de Vilán, agóchase unha das súas maiores xoias: un sarcófago antropoide escavado na rocha.
Espalladas polos seus cumios atoparás moitas mostras de arquitectura popular dedicada ao pastoreo: os chozos, construcións medievais coas que os pastores se protexían das inclemencias do inverno e que resistiron estoicamente o paso do tempo. Igual que o foxo dos lobos co que se protexía o gando, o único foxo dobre de Europa.
A viaxe no tempo continúa se visitas os restos do castelo de Alemparte. Trasládate pedra a pedra á revolta irmandiña de 1467, cando esta fortaleza se converteu en centro da rebelión social dos campesiñado galego contra os abusos feudais.
E para terminar cun bo sabor de boca, polo menos unha vez, tes que vivir a experiencia da Festa da Chanfaina e da Carne do Suído, un auténtico festexo gastronómico de exaltación de produtos autóctonos de altísima calidade: a chanfaina, unha longaínza tradicional de Fornelos feita con só dous días de antelación coas mellores partes dos porcos criados en liberdade nos montes da zona.