Buscar
Achégate ata este templo construído entre 1932 e 1937 e consagrado á Virxe do Carme, a patroa do mar. Deseñado polo arquitecto porriñés Antonio Palacios, autor dalgúns dos edificios máis senlleiros do centro de Madrid do século XX, inspirouse no arco visigótico da desaparecida igrexa parroquial de San Xoán de Panxón, situado xusto en fronte do templo.
Percorre a Ponte Internacional entre Tui e Valença , inaugurada en 1886 e que supuxo un grande avance na comunicación co país veciño. A súa maior singularidade técnica radica no triplo uso, para tráfico rodado, ferroviario e peonil, unha característica pouco común nesta época.
O edificio do Concello do Porriño (1919-1924) constitúe a obra máis importante de Antonio Palacios na súa vila natal. Coñece este proxecto que debeu ter un significado especial para o arquitecto, xa que, ademais de concretar por primeira vez unha arquitectura de raíces galegas, foi unha obra dedicada á súa nai.
Na vila de Redondela atoparaste con dúas xoias arquitectónicas ferroviarias do século XIX: as coñecidas como as pontes de Madrid e de Pontevedra. A primeira, a máis antiga e longa, foi inaugurada en 1876. Combinou a técnica vangardista do ferro forxado e a tradicional cantería dos alicerces sobre os que descansa toda a estrutura.
No Centro Cultural da Guarda o viaxeiro atopará un dos edificios máis emblemáticos da vila, con estilo colonial ou indiano. Descubrirá un tipo de edificacións caracterizadas polo emprego de cantería, azulexo e forxa, con elementos importados do continente americano aplicados ás tipoloxías autóctonas, polo que adquiren un estilo singular e moi persoal.
Viaxa a 1866, ano no que se inaugurou o faro situado no cabo Silleiro, ao nivel do mar. En 1924 inauguraríase o novo edificio, que albergaría o faro a 85 metros no alto da montaña, tal e como se atopa na actualidade.
Atravésana o Camiño Portugués a Santiago de Compostela e a Vía Romana XIX, que unía Brácara Augusta (Braga) e Lucus Augusti (Lugo). Pasea por esta ponte escenario e testemuña da última batalla en Galicia contra o exército de Napoleón, durante a Guerra da Independencia, en xuño de 1809.
