Percorre punto a punto esta ruta para adentrarte na técnica tradicional da construción coa pedra en seco, sen masa de unión ou asentamento. É, sen dúbida, un dos exemplos de técnicas e usos máis relevantes das formas de vida tradicional e a relación das comunidades co medio para a creación da súa paisaxe.
O coñecemento do material, o desenvolvemento dos procesos axeitados para a súa selección e transporte e a habilidade para a construción de estruturas estables e permanentes non che deixarán indiferente. Cada construción posúe unhas características propias e recoñecibles, ademais dunha beleza estética propia.
Non perdas detalle dunha práctica inscrita pola Unesco na Lista Representativa de Patrimonio Cultural Inmaterial da Humanidade en 2018 baixo a denominación ‘Coñecementos e técnicas da arte de construír muros en pedra seca’, que afecta territorialmente a Croacia, Chipre, Francia, Grecia, Italia, Eslovenia, España e Suíza.
Paso a paso visibiliza estas construcións feitas con pedra seca presentes nas numerosas estruturas viarias ou de cultivo realizadas con esta técnica en Galicia ou na gran cantidade de conxuntos etnográficos dentro da nosa arquitectura popular.
Imos pedra a pedra?