Buscar
O rico patrimonio material e inmaterial de Gondomar explícase pola súa situación estratéxica, xa que se atopaba no tramo da importante vía medieval e da Idade Moderna, entre Tui, cidade episcopal, e Baiona, vila de reguengo e principal porto do sur de Galicia nese momento. Explora o Pazo de Gondomar, a cabalo entre unha edificación señorial e unha fortificación militar, para viaxar polas diferentes etapas históricas a través das súas continuas transformacións desde a súa construción entre o século XIV e XV.
Mergúllate nunha contorna dunha gran beleza paisaxística cun total de 57 muíños entre os do Folón e os do Picón. Foron construídos nos séculos XVIII e XIX, aínda que xa existen referencias no século XVII. Coa implantación e a xeneralización do cultivo do millo aumenta a súa produción ata completar un dos conxuntos etnográficos máis importantes de Europa.
Situado a carón da antiga calzada romana que unía Bracara Augusta con Tui e Santiago de Compostela, a súa historia sinala que pertenceu á poderosa Casa de Soutomaior. Non podes perderte a visita ao edificio que era residencia dos Marqueses de Mos, título concedido polo Rei Carlos II a D. Gabriel Sarmiento de Soutomaior no século XVII e con dramático final: foi pasto do lume e destruído polas tropas francesas nos primeiros anos do século XIX.
A historia desta construción está ligada á da veciña fortificación de Goián, construída xunto a outras ao longo do Baixo Miño para a defensa da fronteira con Portugal. Descubre un dos sistemas defensivos máis complexos de toda a península ibérica, tanto polo volume de arquitecturas que o integraban, con seis fortalezas no lado galego e tres no portugués, como polas súas diferenzas tipolóxicas.
Álvaro Cunqueiro definiu Galicia como “o país dos mil ríos”, cada un deles cos seus diferentes muíños, elementos primordiais do patrimonio etnográfico e testemuñas mudas dunha intensa vida social arredor da que se teceron historias, cantares, ditos populares, danzas… O lugar forma parte da Senda da Fraga do Barragán, xunto a Pazos de Borbén, e atópase moi preto do Monte da Cidade, asentamento histórico que garda multitude de segredos. Descubrímolos?
Namórate deste edificio levantado no século XVI, como moitas outras casas nobres e relixiosas no século posterior ao descubrimento de América, que tanta transcendencia tivo para Baiona e o sur de Galicia. Nel establecéronse as monxas de clausura da orde das dominicas e forma parte dos edificios máis emblemáticos do conxunto histórico de Baiona.
