Buscar
Na catedral de Tui o viaxeiro atoparase na maior fortificación medieval de Galicia. Conserva o claustro máis grande da actualidade e conta coa primeira portada gótica da península ibérica. Será a súa situación, nun punto elevado da fronteira con Portugal, a que determine o seu uso.
En Santa María de Oia descubrirás unha das xoias que a herdanza cisterciense deixou en Galicia e o único mosteiro da orde situado a carón do mar. A súa comunidade monástica foi a de maior importancia da diocese de Tui.
Durante a Idade Media, San Simón e toda a ría de Vigo foron fonte de inspiración dos principais trobadores da época. A cantiga de amigo de Meendinho, ambientada na illa, considérase unha das xoias máis importantes da lírica galego-portuguesa do século XIII.
Adentrarse no castelo de Soutomaior é facelo nunha das fortalezas máis emblemáticas de Galicia que se conservan en pé mantendo parte do seu estado orixinal. A finais do último terzo do século XV é cando o castelo consegue o seu máximo esplendor, coa figura de Pedro Álvarez de Soutomaior, máis coñecido como Pedro Madruga.
Metade fortaleza medieval, metade pazo galego, a fortaleza de Monterreal é unha das máis grandes que se conservan en toda España. Foi aquí tamén onde, o 1 de marzo de 1493, atracou unha das carabelas da expedición que Cristovo Colón capitaneara cara ás Indias. Tratábase da Pinta, coa que chegou a noticia do descubrimento de América.
Mergúllate na época romana percorrendo esta ponte construída sobre o que na súa orixe foi a calzada romana Vía XX. Este tipo de pontes transformaron o territorio entre os séculos XII e o XIII, porque facilitaron o comercio e o paso da peregrinación cara Santiago de Compostela.
