Buscar
Bañado por augas do río Miño e do océano Atlántico, O Rosal pon nas túas mans a súa singular natureza, o seu rico patrimonio natural e cultural, e a súa oferta enoturística e gastronómica.
Arranca a túa visita poñéndote en situación: sube ás zonas altas da localidade para gozar dunhas panorámicas do val únicas, do tramo final do río e do veciño Portugal. Miradoiros naturais cheos de lendas e historias como Niño do Corvo ou a ermida da Madalena e verdadeiros balcóns ao Atlántico, como o de Cruz da Portela ou a Explanada do Horizonte de Portecelo.
Contempla a paisaxe do estuario do Miño percorrendo a Senda dos Pescadores desde a praia das Eiras ata As Aceñas, no río Tamuxe. Pon calzado cómodo e reláxate coa ruta de sendeirismo polos muíños do Folón e do Picón, un grupo de 60 muíños en fervenza construídos no século XVIII únicos en Europa. E é que cada paso na túa ruta polo Rosal te guiará polas pegadas que a historia foi deixando na súa paisaxe: desde gravados prehistóricos e sepulcros escavados na rocha a pequenas ermidas ou grandes igrexas de interesante arquitectura.
Cálzate as botas de peregrino e percorre os 3 km do Camiño Portugués da Costa que pasan pola localidade rosalesa, nos que te acompañarán a brisa atlántica, o bater das ondas e unha paisaxe de contrastes entre a beira do mar e os cumios rochosos da serra da Groba.
Afonda nas súas raíces visitando na praza do Calvario o monumento aos ‘cabaqueiros’, unha homenaxe a todos os rosaleses que traballaron na arte de facer tellas, un oficio duro, hoxe en extinción, que as familias loitan por manter vivo na memoria cultural. E, para poñerlle o broche de ouro á túa visita, degusta un dos ricos viños D.O. Rías Baixas da zona.
O Rosal vívese cos cinco sentidos.
Máis información
