Buscar
Unha das formas máis rápidas de chegar ata o noso territorio é en avión, xa que temos tres aeroportos internacionais nun raio de 150 km desde os que chegar facilmente a calquera dos nosos municipios: o aeroporto de Peinador (Vigo), situado no propio ámbito do xeodestino; o aeroporto Rosalía de Castro (Santiago de Compostela), a apenas 80 km de Soutomaior; e o aeroporto de Sá Carneiro, na cidade do Porto, a 120 km de Tui.
O tren é outra das opcións para chegar ao noso territorio de maneira cómoda a través das diferentes liñas que conectan Galicia co resto de cidades españolas e europeas e das liñas que comunican as distintas cidades galegas. As estacións de maior tamaño próximas ao xeodestino son as dúas terminais de Vigo, Urzáiz e Guixar, ambas no centro da cidade, ás que se pode chegar desde Madrid, Barcelona, Ourense, Pontevedra, Santiago, A Coruña, Ponferrada, León, Bilbao, Alacant e O Porto, entre outras, e desde alí desprazarse a calquera dos nosos 14 concellos.
Se prefires utilizar o autobús para as túas viaxes, o noso territorio conta cunha importante rede de infraestruturas viarias que che facilitarán a chegada. As completas estacións e terminais de grandes cidades como Vigo, Santiago e O Porto conéctannos co resto de España e Portugal. Desde elas hai dispoñibles diferentes rutas que enlazan estas cidades cos nosos concellos.
Unha das formas máis habituais de viaxar ata o noso xeodestino é no coche. As boas conexións do territorio permiten chegar calquera dos nosos municipios por autoestrada ou autovía desde Madrid, Santiago, A Coruña e O Porto.
Hai tres grandes vías de conexión por estrada:
Se vés desde Portugal, en Caminha encontrarás unha forma de chegar ao noso territorio diferente: o transbordador. Un traxecto curto, pero moi divertido, sobre todo se se viaxa con nenos, que une a localidade lusa ata o barrio da Pasaxe, na Guarda.
Os traxectos realízanse ás horas en punto desde Caminha e ás e media desde A Guarda, aínda que non ten un horario fixo, xa que a saída do transbordador depende das mareas. Debido ao calado desta zona do río, o barco só pode navegar cando a marea está alta, polo que é recomendable consultar os horarios antes de embarcarse nesta aventura.
Teléfono: 986 611 526