Buscar
Os miradoiros de Turonio son lugares onde gozar de espectaculares vistas sobre o xeodestino da Ría de Vigo e do Baixo Miño.
Deste xeito, cos miradoiros de Turonio coñecerás a todos os concellos do xeodestino.
Xunto á Airoa, na parroquia da Laxe de Fornelos de Montes, atoparaste unha lomba de forma piramidal ata os 653 metros sobre o nivel do mar. Desde o alto dominaremos unha fermosa vista destes vales, aínda que o máis significativo deste lugar é que hai máis de dous mil anos o montículo serviu de base para un poboado castrexo.
O río Borbén forma un gran val que se esconde entre a serra do Galleiro e os montes de Festín. Preto da poboación de Borbén, localízase o monte da Berra, de 499 metros. Nunha das súas ladeiras ábrese este fantástico miradoiro do Santo Aparecido.
Este monte foi, desde tempos afastados, ocupado por diversos asentamentos, entre os que destacan un antigo castro e o castelo de Castrizán. Ademais da visión de gran parte da enseada de San Simón, divísase a entrada da ría de Vigo e boa parte das súas ribeiras, coas illas Cíes ao fondo.
Seguindo o trazado do Camiño de Santiago portugués ao seu paso por Redondela, chegamos ao monte coa mellor perspectiva frontal da ría de Vigo, o Alto da Cabaleira. Un miradoiro privilexiado desde o que se contempla toda esta ría e o val do río Verdugo.
Para coñecer o Castelo de Mos terás que achegarte ao Galleiro, xusto nos límites dos concellos de Mos e Ponteareas. Dende el vixiábanse os posibles ataques procedentes do interior. Moitos montes onde se poden atopar restos de fortalezas ou castros tamén servían para dar acubillo aos habitantes das zonas de influencia fronte aos invasores.
A súa situación estratéxica serviu para que este enclave estivese habitado desde tempos remotos. Desde a Baixa Idade Media, pasando polas guerras feudais ata chegar á invasión francesa, o lugar foi punto estratéxico e de gran valor para a comarca.
O petróglifo da Auga da Laxe, coñecido polos vellos como a Pedra das Procesións, conta con 26 armas prehistóricas esculpidas. Este impresionante conxunto de petróglifos sitúase a poucos metros dos maxestosos penedos do monte Galiñeiro que, xunto ao monte Aloia e a fortaleza do Faro de Budiño, vixiaban a corredoira desde o Miño ata o interior da provincia da Coruña.
Na parroquia de Chandebrito, no concello de Nigrán, sitúase, a 331,7 metros sobre o nivel do mar, o chamado monte do Castro, tamén coñecido como monte das Cruces. Aínda que na actualidade tamén é un gran miradoiro á ría de Vigo, estarás ante un dos castros máis antigos de Galicia.
Situado no camiño do alto da Groba, desde alí poderás contemplar a boca da ría de Vigo cunha perspectiva diferente das illas Cíes. Ademais de por esta espectacular paisaxe, a Groba é coñecida por outros aspectos da vida e da arte, xa que posúe unha das concentracións de rocas gravadas máis numerosa de Galicia.
Oia dispón de centos de descubrimentos arqueolóxicos entre castros, castelos e petróglifos, algún deles antre os máis singulares de Europa. Moitos investigadores afirman que os seus montes, pola súa situación determinante entre a costa e o interior, constituían o gran conxunto defensivo de Turonio e do comercio marítimo da zona. O espazo arqueolóxico da Pedreira poderiamos definilo como un miradoiro-santuario.
Aquí estarás ante un miradoiro natural ao esteuro do Miño, Portugal, ao val e ao océano Atlántico. Esta excepcional localización, a pe de mar e da desembocadura do Miño, foi a que fixo prosperar ao Castro de Santa Trega, un dos máis habitados de Galicia e datado, polo menos, desde o século IV c.C.
Nos límites dos concellos do Rosal e de Tomiño localízase unha serie de pequenas montañas a unha altura duns 300 metros, a serra do Argalo. Trátase dun lugar estratéxico para poder observar marabillosas vistas, cunha panorámica que sorprende a todos os visitantes. Un destes montes chámase Niño do Corvo e cara ao sur atópase o Cabezo Gordo.
Este monte divide os concellos de Tomiño, Tui e Gondomar. A súa cima elévase ata os 474 metros e desde ela divísase boa parte do Val Miñor e do Baixo Miño. Visítao e sorpréndete coas súas ladeiras, que albergan uns dos conxuntos de petróglifos máis significativos e importantes do suroeste de Galicia.
Neste parque o visitante non só pode desfrutar do patrimonio natural do territorio, senón tamén dun magnífico patrimonio histórico e cultural. A pegada do ser humano atópase neste lugar desde hai 20 000 anos e déixanos importantes achados e restos arqueolóxicos, como o castro do alto dos Cubos ou os restos do alto de san Xiao, así como da enigmática muralla ciclópea que rodeaba este cumio.