Buscar
Vive o patrimonio natural e cultural de Tomiño. Déixate sorprender pola súa arte, a súa natureza, a súa gastronomía, a súa arquitectura… percorrendo calquera das súas infinitas rutas, nas que as paisaxes máis fermosas se unen coa historia.
Sigue a senda do Miño ata a praia fluvial de Goián e descubre o Espazo Fortaleza, un dos enclaves fortificados mellor conservados da fronteira húmida. Trátase dun espazo diferente, que deseñou o arquitecto Pablo Gallego Picard, distinguido con importantes premios de arquitectura, urbanismo e paisaxe.
Non é o único achado arquitectónico desta localidade. Ao longo das súas rúas poderás encontrar numerosos exemplos de arquitectura indiana, construcións sobre todo de finais do século XIX e principios do XX financiadas por emigrantes que volvían de América con aforros e fortuna. Escolas, casas consistoriais, vivendas particulares, palcos de música… son testemuñas do progreso económico, educativo, social ou agrícola que estes emigrantes achegaron á súa terra natal, á que se sentían moi unidos.
Cruceiros, petos de ánimas, muíños, pontes medievais feitas con sabedoría popular… únense a outro tipo de arquitectura civil, militar e relixiosa, como o pazo barroco Casa Forte dos Correa en Goián ou as numerosas igrexas parroquiais orixinarias do século XII que aínda conservan moitos elementos románicos.
Goza dun territorio tan singular como Tomiño, co seu marcado carácter fronteirizo, coñecendo o seu amplo patrimonio cultural, de gran valor histórico e etnográfico. Viaxa ao pasado visitando o ecoparque arqueolóxico Monte Tetón, onde te sorprenderá un dos conxuntos de arte rupestre máis importantes do sur de Europa, no que se encontran preto de 200 gravados prehistóricos.
Se prefires perderte na natureza, aquí encontrarás recunchos máxicos bañados polo río Miño e os seus afluentes, a singularidade xeolóxica da Pedra Furada, a serra do Argallo ou o complexo natural da Groba.
Vés descubrir todos os seus segredos?
Máis información
